நெல்லை ராதாபுரம் கால்வாயில் சபாநாயகர் அப்பாவு தண்ணீர் திறந்து வைத்தார். நெல்லை மாவட்டம் ராதாபுரம் கால்வாயில் விவசாய நிலம் பாசன வசதிக்காக ஆண்டுதோறும் ஜூன் 15 தண்ணீர் திறந்து விடப்படுவது வழக்கம்.
இந்த நிலையில் கடந்த ஆண்டு பெய்த அதிக மழையால் பெருவெள்ளம் ஏற்பட்டது. இதன் காரணமாக கன்னியாகுமரி தோவாளை கால்வாயில் உடைப்பு ஏற்பட்டது.
அவை சரி செய்யப்பட்டு இன்று கன்னியாகுமரி தோவாளை கால்வாய் நிலப்பாறை என்ற இடத்தில் இருந்து ராதாபுரம் கால்வாய்க்கு பாசன வசதிக்காக தண்ணீர் திறந்து விடப்பட்டது.தமிழக சட்டப்பேரவைத் தலைவர் அப்பாவு, கால்வாயில் இருந்து தண்ணீரை திறந்து வைத்தார். தினமும் 150 கன அடி வீதம் என 138 நாட்களுக்கு பாசன வசதிக்காக தண்ணீர் திறந்து விட தமிழக அரசு அரசாணை வெளியிட்டது. அதன்படி இன்று தண்ணீர் திறந்து விடப்பட்டு உள்ளது.
இந்த தண்ணீர் மூலம் ராதாபுரம் தாலுகாவில் அமைந்துள்ள 52 குளங்கள் மூலம் 17,000 ஏக்கர் விவசாய நிலம் பாசன வசதி பெறும். சுமார் நூற்றுக்கணக்கான கிராம பகுதிகளுக்கு குடிநீர் ஆதாரமாக இந்த ராதாபுரம் கால்வாய் உள்ளது.
இதனை தொடர்ந்து பின்னர் செய்தியாளர்கள் சந்திப்பில் சபாநாயகர் அப்பாவு பேசுகையில்: ராதாபுரம் கால்வாய் பாசனத்தில் உள்ள 52 குளங்கள் நிரப்பப்படும். மடைகளை கண்காணிக்க, சீராக தண்ணீர் திறந்து விட ஐந்து லஸ்கர்கள் நியமனம் செய்யப்பட்டு உள்ளனர்.
மதச்சார்பின்மை என்பது ஐரோப்பாவில் உருவான சித்தாந்தம் எனவும், தர்மத்தின் அடிப்படையில் பாரதம் செயல்படுவதால் இங்கு மதச்சார்பின்மை தேவை இல்லை என ஆளுநர் கருத்து கூறியது தொடர்பாக செய்தியாளர்கள் எழுப்பிய கேள்விக்கு சபாநாயகர் பதில் அளிக்கையில்,
இந்தியா ஒரு மதச்சார்பற்ற நாடு. ஜாதி, மதம், பாலுணர்வு, பிறப்பின் அடிப்படையில் வேறுபாடு காட்டக்கூடாது என்பதை இந்திய அரசியலமைப்பு சட்டம் 15 மற்றும் 17 கூறுகிறது. ஆர்.எஸ்.எஸ் சித்தாந்தம், மனுதர்மம், சனாதன தர்மம் ஆகியவை குறிப்பிட்ட 10% மக்களுக்காக ஏற்படுத்தப்பட்டது.
கோட்சேவின் பார்வையில் ஆளுநர் ரவி உள்ளார். அவர் இந்திய அரசியல் அமைப்பு சட்டத்திற்கு எதிராக பேசுவதை நிறுத்திக் கொள்ள வேண்டும். இந்திய அரசியலமைப்புச் சட்டத்தில் 15 மற்றும் 17 ஐ படித்துவிட்டு பேச வேண்டும் என கூறினார்.
