எலெக்ட்ரிக் வாகன தொழில்நுட்பத்தில் முன்னேறும் அல்ட்ராவைலட்:
இந்தியாவில் எலெக்ட்ரிக் இருசக்கர வாகன தயாரிப்பு நிறுவனங்கள், அதிக விற்பனை நோக்கி ஓடிக் கொண்டிருக்கும் போது, எலெக்ட்ரிக் வாகன தொழில்நுட்பத்தை மேம்படுத்துவதில் ஆர்வம் காட்டி வருகிறது அல்ட்ராவைலட். மேலும், இந்தியாவில் மட்டுமின்றி உலக அளவிலும் தங்களது எலெக்ட்ரிக் பைக்குகளை அறிமுகப்படுத்தும் முனைப்பிலும் இருக்கிறது அந்நிறுவனம். அதன் முதல் படியாகவே ஐரோப்பாவிற்கான எலெக்ட்ரிக் பைக் ஏற்றுமதி தொடக்கம் பார்க்கப்படுகிறது.
அல்ட்ராவைலட்டின் எலெட்ரிக் பைக்:
தற்போது F77 மாக் 2 (F77 Mach 2) என்ற ஒரேயொரு எலெக்ட்ரிக் பைக் மாடலை மட்டுமே விற்பனை செய்து வருகிறது அந்நிறுவனம். முன்னதாக 2022ம் ஆண்டு F77 எலெக்ட்ரிக் பைக்கை வெளியிட்டது அல்ட்ராவைலட். அதனைத் தொடர்ந்து, அதன் மேம்பட்ட வடிவமாக F77 மாக் 2 எலெக்ட்ரிக் பைக்கானது இந்தாண்டு ஏப்ரல் மாதம் வெளியிடப்பட்டது.
இந்த எலெக்ட்ரிக் பைக்கானது இந்தியாவில் ரூ.2.99 லட்சம் என்ற அறிமுக எக்ஸ்-ஷோரூம் விலையில் விற்பனை செய்யப்பட்டு வருகிறது. எரிபொருள் பைக்குகளுடன் ஒப்பிட்டால் 300 – 400 சிசி பைக்குகளுக்கு இணையான பைக்கான திறனை இந்த F77 மாக் 2 கொண்டிருக்கிறது. ஐரோப்பாவிற்கும் இந்த பைக்கையே தற்போது ஏற்றுமதி செய்யத் தொடங்கியிருக்கிறது அல்ட்ராவைலட்.
அல்ட்ராவைலட் F77 மாக் 2:
இந்த அல்ட்ராவைலட் F77 மாக் 2 எலெக்ட்ரிக் பைக்கானது 40.2hp பவர் மற்றும் 100Nm டார்க்கை உற்பத்தி செய்யும் எலெக்ட்ரிக் மோட்டாரைக் கொண்டிருக்கிறது. சிங்கிள் சார்ஜில் 323 கிமீ வரை செல்லும் திறனைக் கொண்டிருக்கும் இந்த பைக்கானது, அதிகபட்சமாக மணிக்கு 155 கிமீ வேகத்தையும் எட்டுகிறது.
இந்த எலெக்ட்ரிக் பைக்கின் பேட்டரியை அந்நிறுவனத்தின் வழக்கமான 1.3kW சார்ஜரைக் கொண்டு சார்ஜ் செய்தால் 20-80% வரை 5 மணி நேரத்திலும், 3.0kW பூஸ்டர் சார்ஜர் கொண்டு சார்ஜ் செய்தால் 2.5 மணி நேரத்திலும் சார்ஜ் செய்ய முடிகிறது.
இந்த பைக்கில் ட்ராக்ஷன் கண்ட்ரோல், டைனமிக் ரீஜென், டெல்டா வாட்ச், ஹில் ஹோல்டு அசிஸ்ட் மற்றும் பார்க் அசிஸ்ட் ஆகிய வசதிகளையும் கூடுதல் தேர்வாகக் கொடுக்கிறது அல்ட்ராவைலட்.
அல்ட்ராவைலட் F99 ஃபேக்டரி ரேஸிங் பிளாட்ஃபார்ம்:
இந்த F77 பைக் மட்டுமின்றி, F99 ஃபேக்டரி ரேஸிங் பிளாட்ஃபார்ம் என்ற எலெக்ட்ரிக் ரேஸ் பைக் ஒன்றையும் உருவாக்கி வருகிறது அல்ட்ராவைலட். இந்த பைக்கின் தயாரிப்புக்கு முந்தைய நிலை வடிவத்தை சமீபத்தில் அறிமுகப்படுத்தியிருந்தது அந்நிறுவனம். அதிவேகத்தை எட்டும் இலக்குடன், ட்ராக்கை மையப்படுத்திய எலெக்ட்ரிக் பைக்காக இந்த F99 பைக்கை உருவாக்கி வருகிறது அல்ட்ராவைலட்.
இந்த ட்ராக் பைக் வெளியான பின்பு, இதனை அடிப்படையாகக் கொண்ட ரோடு லீகல் ஸ்ட்ரீட் பைக்கை உருவாக்கி வெளியிடவும் அந்நிறுவனம் திட்டமிட்டு வருவது குறிப்பிடத்தக்கது.
