கலைஞர் மகளிர் உரிமைத் தொகை திட்டம் குறித்த அறிவிப்பு 2021 சட்டமன்றத் தேர்தலில் திமுக வெற்றி பெற்று ஆட்சியமைத்ததற்கு முக்கிய காரணங்களில் ஒன்றாக இருந்தது. தற்போது மக்களவைத் தேர்தலில் திமுக கூட்டணி 40க்கு 40 இடங்களில் வெற்றி பெற்றிருப்பதற்கும் கலைஞர் மகளிர் உரிமைத்தொகை திட்டத்திற்கு பங்கு உள்ளது.
மகளிர் உரிமைத் தொகை திட்டத்திற்கு வரவேற்பு!
சுமார் ஒரு கோடியே 17 லட்சம் மகளிர் இந்த திட்டத்தில் பயனாளிகளாக உள்ளனர். இத்தனை குடும்பங்கள் இதன் மூலம் பயன்பெறுவது மக்களிடையே வரவேற்பை பெற்றுள்ளது. தெலங்கானா, கர்நாடகா, மகாராஷ்டிரா போன்ற பிற மாநிலங்களில் இந்த திட்டம் செயல்படுத்தப்படுவதற்கு தமிழகத்தில் கிடைத்த வரவேற்பே காரணம் ஆகும்.
கிராமப் பொருளாதாரம் உயர்வு!
குடும்பத்துக்காக உழைக்கும் பெண்களின் உழைப்பை அங்கீகரிக்க வேண்டும், பொருளாதார ரீதியாக அவர்கள் யாரையும் சாராமல் அவர்களது சுயமரியாதை காக்கப்பட வேண்டும் என்ற குறிக்கோள் இந்த திட்டத்தின் பின்னணியில் உள்ளது. பெண்கள் தங்கள் குழந்தைகளின் கல்வி மற்றும் மருத்துவச் செலவுக்கு இந்த பணத்தை பயன்படுத்திக் கொள்வதாகவும், இதன் மூலம் கிராமப் பொருளாதாரம் உயர்ந்து வருவதாகவும் அரசு தரப்பில் தெரிவிக்கப்படுகிறது.
திமுக கூட்டணிக்குள் சலசலப்பு
ஆனால் திமுக கூட்டணியில் அங்கம் வகிக்கும் விடுதலை சிறுத்தைகள் கட்சியின் துணைப் பொதுச் செயலாளர் ஆதவ் அர்ஜுனா திட்டம் குறித்து தனது பார்வையை வேறு விதமாக முன்வைக்கிறார். விசிக மது ஒழிப்பு மாநாட்டை கள்ளக்குறிச்சியில் நடத்த திட்டமிட்டுள்ள நிலையில் அது தமிழக அரசியல் களத்தில் சர்ச்சையை கிளப்பியது. குறிப்பாக திமுக கூட்டணிக்குள் சலசலப்பை ஏற்படுத்தியது.
மகளிர் உரிமைத் தொகை பணம்!
இந்நிலையில் தனியார் தொலைக்காட்சி ஒன்றுக்கு அளித்த பேட்டியில் பேசிய ஆதவ் அர்ஜுனா, மகளிருக்கு மாதம் தோறும் 1000 ரூபாய் வழங்கும் கலைஞர் மகளிர் உரிமைத் தொகை திட்டம் நல்ல திட்டம் தான். ஆனால் அந்த பணம் மதுக்கடைகளுக்கு தான் பெரும்பாலும் செல்கிறது. பயனாளிகளின் வங்கி அட்டைகளை அவர்கள் வீட்டிலுள்ள ஆண்கள் எடுத்துச் சென்று பணம் எடுத்து அதற்கு மது வாங்கி குடிக்கின்றனர்.
தமிழக அரசுக்கு திரும்ப செல்லும் 1000 ரூபாய்?
செந்தில் பாலாஜி வழக்கில் நீதிபதி மாற்றம்: அடுத்து என்ன நடக்கும்? எகிறும் எதிர்பார்ப்பு!
மது விற்பனை குறித்து நாங்கள் ஆய்வு நடத்தி வரும் நிலையில் மகளிர் உரிமைத் தொகை திட்டம் அமலுக்கு வந்த பின்னர் மது விற்பனை அதிகரித்துள்ளதாக கூறியுள்ளார். இது மகளிர் உரிமைத் தொகை திட்ட பயனாளர்களிடம் அதிர்ச்சியை ஏற்படுத்தியுள்ளது. ஏனெனில் ஒவ்வொரு குடும்பத்திலும் மாத பட்ஜெட்டில் இந்த தொகை முக்கிய பங்காற்றுகிறது. குழந்தைகளின் கல்வி செலவு, பயணச் செலவும், மருத்துவச் செலவும் மற்றும் அவர்கள் கேட்பதை வாங்கித் தர முடிகிறது என்று மகளிர் பாசிட்டிவாக பேசும் போது விசிக நிர்வாகியின் கருத்து முகம் சுழிக்க வைப்பதாக கூறுகின்றனர்.
